Өдгөөгөөс хэдэн жилийн өмнө сонгуулийн сурталчилгааны нарийвчилсан хуультай болж, аль ч шатны сонгуулиар мөрдөгдөх болсон. Тиймээс хууль зөрчсөн нэр дэвшигчид хариуцлагаа хүлээдэг жишиг тогтоод удаж буй. 2012 оны сонгуульд “насанд хүрээгүй хүүхдээр сурталчилгаа хийлгэсэн” гэх үндэслэлээр УИХ-ын 10 дугаар тойрогт нэр дэвшсэн С.Чинзориг, Н.Төмөрхүү нарыг 1500-3000 хүний саналаар илүүрхэж байхад нэрийг нь татаж байсан гашуун сургамж бий. Мөнхүү энэ үндэслэлээр бэлэг тараасан нөхдөд ч хариуцлага үүрүүлж байсан. Харин МАХН-аас Ерөнхийлөгчийн сонгуульд нэр дэвшигч С.Ганбаатар “Хүүхдийн баяр”-аар хүүхдүүдэд бэлэг тарааж, түүнийгээ хэвлэл мэдээллийн хэрэгслээр сурталчилсан нь жинхэнэ хууль зөрчсөн асуудал болов. Энэхүү хууль зөрчсөн үйлдлээ “Би УИХ-ын гишүүн байсныхаа хувьд” хэмээн тайлбарласан. Уг нь хуулийн дагуу зургадугаар сарын 5-нд буюу өнөөдөр Ерөнхийлөгчийн сонгуульд нэр дэвшигчийн сурталчилгааны ажил орон даяар эхэлж байна. Гэтэл С.Ганбаатарыг ийнхүү хууль зөрчсөн байхад хууль хяналтынхан ч тоохгүй байна, өрсөлдөгчид нь ч тоохгүй байна. Эндээс харвал, МАН, АН-аас нэр дэвшигчид С.Ганбаатарыг өрсөлдөгч гэж харахгүй байгаа бололтой.
