Дэвид, Виктория Бекхэм нарын гурван настай охин Харпер оддын хүүхдүүд дундаа хамгийн загварлагт ордог байна. Тэрбээр Нью-Йоркийн загварын долоо хоногийн үеэр “Bonpoint”-ын “Tamara” хар даашинзаар гангарсан бол өмнө нь гадуур зугаалахдаа нарийн жийнсэн дээр үслэг пальто өмсөж, хүрэн ботинкоор тодосгожээ.
“Children Worldwide Fashion”-ы мэдээлснээр Харпер охины өмссөн бүрх малгай, пальто, гутал нь “Chloe”-ын ээлжит загвар бөгөөд худалдаанд гараагүй байгаа гэнэ.
Лондон дахь “Blue Almonds” хүүхдийн хувцасны дэлгүүрийн эзэн “Харпер бол моданы ертөнцөд хамелеон л гэсэн үг. Тэрбээр сонгодог бөгөөд хөгжилтэй, загварын ертөнцийн судсыг гартаа атгасан нэгэн. Тэр уламжлалт даашинзнуудын төрөл бүрийн загвараас эхлээд хөлбөмбөгийн өмсгөл ч өмсөж мэдэхээр охин. Би Харпертэй танилцсанаас хойш тэр хувцсыг яаж гайхалтай зохицуулдгийг чадварлагаар харуулсан. Томчууд ч түүнээс суралцах хэрэгтэй” хэмээжээ.
Харин охины аав нэрт хөлбөмбөгчин Дэвид Бекхэм “Харпер маргааш өмсөх хувцсаа өмнөх орой нь бэлдэж тавьдаг. Харин өглөө түүнийг хувцаслах гэхэд аль хэдийн бодлоо өөрчилчихсөн сууж байх жишээтэй. Ингээд хамтдаа хувцсаа сонгох болоход миний сонгосон бүхнээс татгалздаг” гэжээ.
Түүнчлэн хувцасны дэлгүүрийн эзэн “Виктория охиндоо хямд даашинз өмсгөх дуртай. Гэхдээ энэ даашинзаа энгэр нь задгай цамц, эсвэл бүрх малгайгаар чимдэг. Мэдээж Харпер ээжийнхээ загварлаг зангийн ачаар моданы ертөнцөд тэргүүлж байгаа нь лавтай. Тэдний стиль бол энгийн хэрнээ чанартай материалаар гоёх юм” хэмээжээ.
