Н.Энхбаяр: Миний хувьд МАН-ын ямар нэгэн албан тушаалд очихгүй

QR кодыг уншуулж мэдээг утсаараа унших боломжтой.

МАХН-ын Их чуулганаас МАН-тай нэгдэхийг дэмжсэн шийдвэр гаргасан билээ. Шийдвэрийн дагуу МАХН Улсын дээд шүүхэд хандсан байна.

Нэгдэх болон бие даасан үйл ажиллагаагаа зогсоох талаар тус намаас өнөөдөр мэдээлэл хийлээ.

МАХН-ын дарга Н.Энхбаяр "МАН, МАХН нэгдэх шийдвэрийг гаргахад анхан шатны байгууллагын гишүүдээс саналыг нь асуусан. МАХН-ын анхан шатны байгууллагатай хамтарч, зарим дүүргүүдэд хурал зохион байгуулсан. МАН, МАХН хоёр нэг түүхтэй, нэг үзэл баримтлалтай нам. 10 жилийн өмнө хоёр өөр үзэл баримтлалтай болсон учраас хоёр нам болсон. МАНАН гэдэг улс төрийн үзэгдэл Монголд байж болохгүй.

Сүүлийн үед энэ үзэгдлийн хор уршгийг олон хүн мэдэрсэн. Ингээд манай намын гишүүд МАНАН гэсэн үзэгдлийн эсрэг боссон.

2009 онд Оюутолгойн гэрээг биднийг шүүмжилж байхад нийгэм ойлгоогүй. 10 жилийн дараа тухайн гэрээг үнэхээр луйвар, засахаас өөр аргагүйг ойлгосон. Мөн Дубайн гэрээг хүчингүй болгох ёстой гэсэн шүүмжлэлийг манай намаас олон жил гаргасан. Эрдэнэтийн 49 хувийн луйвар булхайг МАН, МАХН хамтын хүчээр таслан зогсоосон. Хууль, шүүхийн луйврыг мөн л олон жил ярьсан. Олон хүн баригдаж, хэлмэгдсэн. Үзэл баримтлал, түүхийн хувьд нэг улс төрийн хоёр хүчин нэгдэж байна. Тавдугаар сарын 16-ны өдөр гаргасан нам нэгдэх шийдвэрээ ажлын 5 хоногт багтаан Дээд шүүхэд хүргүүлж байна.

Ерөнхийлөгчийн сонгуулийн өмнө МАН-тай нэгдэж байгаа нь эв нэгдлийг эхлүүлэхтэй холбоотой. Эв нэгдлийн үлгэр жишээг өөрсдөө үзүүлье гэж бодсон.

Мэдээж хэрэг томоохон зорилтуудыг хэрэгжүүлэхэд МАХН-ын гишүүд оролцоно. Гэхдээ өнөөдөр албан тушаалаа тохирсон зүйл байхгүй. Намын албан тушаалд МАХН-д квот өгсөн. Ойролцоогоор 30 орчим хувь ч гэдэг юм уу.

Жишээлбэл, МАХН-ын гишүүдээс Удирдах зөвлөлд 8, бага хуралд 110, нийслэл, аймгийн намын хорооны тэргүүлэгч гишүүнээр тус тус 6, сумын болон дүүргийн намын хорооны тэргүүлэгчээр 4 хүн очно. Улсын хэмжээнд намын албан тушаалд МАХН-ын төлөөлөл болсон 2,100 орчим хүн ажиллана.

Энэ бол намын дотоод асуудал. Төр засгийн асуудлын хувьд орон сууцны төсөл, өргүй Монгол, бага хүүтэй зээл олгох зэрэг ажилд МАХН-ын хүмүүс мэдээж хэрэг дайчлагдана. Тухайн асуудлыг шийдэхэд ямар хүмүүс ажиллах вэ гэдгийг хоёр талын ажлын хэсэг гарч шийднэ. МАХН, МАН-аас тус тус 5 хүнтэй ажлын хэсэг бий. Манай намаас би даргална. МАН-аас мөн намын дарга нь даргална. У.Хүрэлсүх Ерөнхийлөгчөөр сонгогдвол дараагийн дарга нь ажлын хэсэгт орно.

Бидний энэ хамтыг ажиллагааг 2024 он гэж төсөөлж байна. Үүний дараа энэ үйл ажиллагаа дуусаад цаашид нэг нам болсон болохоор ажлын хэсэг байх шаардлагагүй гэж бодож байна. Миний хувьд МАН-ын ямар нэгэн албан тушаалд очихгүй. Бага хурал, Удирдах зөвлөлд ажиллахгүй. Өөрийн нэрээ татаж байгаа. Залуучууд ажиллах хэрэгтэй. Үндсэн хуулийг өөрчлөх ажилд санаа бодлоо хуваалцана.

Намын нэрийн хувьд МАН, МАХН гэсэн нэрийг хоёуланг нь зэрэг хэрэглэнэ гэж тохирсон. Монголд МАН, МАХН, АН гэсэн гурван нам бий. Гишүүдийнх нь тоогоор албан ёсоор нам гэж үзнэ.

Гэхдээ бид биеэ тоодоггүй. Биеэ татаж, эх оронч, эв нэгдлийг илэрхийлж байгаа улс төрийн хүчин" гэв.

Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!