Өнөөдөр хайрын баяр. Олон хүн энэ өдөр хайр, дурлал, нандин учралуудаа дурсан санаж тэмдэглэдэг. Маргааш буюу 2-р сарын 15-наас үзэгчдэд хүрэх “Бүтэн амьдрал” олон ангит киноны гол дүрийн жүжигчин З.Онон өөрийн хайрын түүхийг гэгээн хайрын энэ л өдөр уншигчидтайгаа хуваалцаж байна.
З.Онон: Хүнд анхны харцаар дурлаад түүнийгээ хайр болгож чадна гэдэг хамгийн гайхамшигтай зүйл гэж боддог. Анх оюутан болоод СУИС-ийн дотуур байранд байхаас л нэгэн залуу сэтгэлээ илчилдэг байлаа. Би ч тоодоггүй. Нэг өдөр өрөөндөө найзуудтайгаа хөзөр тоглоод сууж байтал хаалга тасхийгээд л явчихлаа. Харсан манай хүн “Онон, чи надтай үерхээч” гэж хэлчихээд ичээд, гүйгээд явчихсан. Оюутны амралт ч боллоо. Тэр үед Идэрээ над руу мессеж бичдэг болчихсон байсан юм. Нутагтаа очоод, сүлжээгүй газар холбоо барьж чадахгүй бүтэн сар болсон. Ашгүй нэг юм хичээл орж, Идэрээ ирэхэд би ямар их санаснаа мэдсэн. Тэр цагаас үерхэж эхлээд одоо 3 хүүхдийн ээж аав болчихсон амьдарч байна даа.
Одоо бодоход бид хоёрт айлын хажуу өрөөнөөс эхлээд түрээсэлж үзээгүй газар гэж байдаггүй. Бүх зүйлийг тэгээс эхлүүлсэн ч хамтдаа байгаа нь л хамгийн их аз жаргал. Ажлаа тараад ирэхэд нь халуун хоол цайгүй зөрөөд гардаг эхнэрийнхээ ажлыг ойлгож, ард минь баттай түшиг тулгуур болж, үр хүүхдээ өвтгөхгүй өсгөж хүмүүжүүлдэгт нь ханьдаа маш их баярладаг. Анх шохоорхож, дурлаж байсан тэр хайраа огт дундруулахгүй харин ч үрийнхээ тоогоор үржүүлж хайрладаг юм шүү дээ. Ханьдаа гэгээн хайрын баярын мэнд хүргэе.
Бид хоёр нэг зүйлд их эмзэглэж явдаг юм. Сүүлийн үед манай нийгэмд салалт ихсэж байгаа нь харамсалтай. Аав, ээжийгээ гээд зориод ирчихсэн гэмгүй хүүхэд сэтгэлийн шархтай, зовлонтой нүдтэй байхыг харах маш хэцүү. Идэрээ бид хоёр ч бас хүүхдүүдийнхээ элэг бүтэн, жаргалтай харцыг харахын төлөө амьдардаг. Тийм ч учраас би өөрийн уран бүтээлээрээ дамжуулан залуустаа уриалга хүргэхийг их хичээдэг. Тэгээд л “Бүтэн амьдрал” олон ангит киноны зохиолыг уншаад энэ бүтээлд заавал тоглох ёстой гэж шийдсэн юм. Залуус маань энэ киног үзээд гэгээн хайрыг мэдрээсэй гэж чин сэтгэлээсээ хүсэж байна. Энэ бүтээлээс та бүхэн хайртыгаа ганцхан өдөр баярлуулаад өнгөрөх биш хором мөч бүрт аз жаргалтай байлгах хэрэгтэй гэдэг санааг мөн ойлгох биз ээ.
