Эрүүгийн цагдаагийн газар байцаагдаж байсан Худалдаа хөгжлийн банкны ТУЗ-ийн дарга Д.Эрдэнэбилэгийг дөнгөж сая авч гарлаа. Түүний өмнө Ц.Пүрэвтүвшинг ЭЦА-наас авч яваад байсан юм.
Мөн дөнгөж сая тус банкны Гүйцэтгэх захирал О.Орхон байцаалтаа өгч дуусан гарч ирлээ.
Чухам хаашаа авч байгаа талаар одоогоор тодорхой мэдээлэл байхгүй байна.
2019 оны 3 дугаар сарын 5 15.10 цаг
Шуурхай: Ц.Пүрэвтүвшин байцаалтаа өгч дуусаад явлаа
АТГ, ЦЕГ-ын хамтарсан ажлын хэсэг өнөөдөр Худалдаа хөгжлийн банкны удирдлагууд болон “Монголиан коппер корпорейшн” ХХК-ийн Гүйцэтгэх захирал Ц.Пүрэвтүвшин нарыг албадан авчирч байцаалт авсан.
Тодруулбал, тэднийг Эрдэнэтийн 49 хувийг хууль бусаар худалдан авсан асуудлаар шалгаж байгаа юм.
Тэгвэл дөнгөж сая “Монголиан коппер корпорейшн” ХХК-ийн Гүйцэтгэх захирал Ц.Пүрэвтүвшин мэдүүлгээ өгч дуусаад Эрүүгийн цагдаагийн албанаас гарч явлаа.
Харин Худалдаа хөгжлийн банкны ТУЗ-ийн дарга Д.Эрдэнэбилэг, гүйцэтгэх захирал О.Орхон нараас байцаалт авч, мөрдөн шалгах ажиллагаа үргэлжилж байна.
2019 оны 3 дугаар сарын 5 13.00 цаг
ЦЕГ: АТГ, ЦЕГ-ын хамтарсан ажлын хэсэг Худалдаа хөгжлийн банкны удирдлагуудыг баривчлан шалгаж байна
Худалдаа хөгжлийн банкны удирдлагуудыг АТГ, ЦЕГ хамтран гүйцэтгэх ажиллагаа явуулж баривчиллаа. Тодруулбал, тус банкны ТУЗ-ийн дарга Д.Эрдэнэбилэг, Гүйцэтгэх захирал О.Орхон нарыг Эрдэнэтийн 49 хувийг хууль бусаар худалдан авсан хэргээр шалгаж байгаа юм.
Баривчилгааны талаар ЦЕГ-ын Хэвлэл мэдээллийн төвийн дарга, дэд хурандаа Б.Баатархүүгээс тодрууллаа.
-Худалдаа хөгжлийн банкны удирдлагуудыг баривчиллаа. Энэ талаар мэдээлэл өгөхгүй юу?
-Эрдэнэтийн 49 хувьтай холбоотой хэрэг дээр ЦЕГ, АТГ хамтран ажлын хэсэг байгуулан шалгаж байна. Уг хэрэгтэй холбогдуулан хэрэг бүртгэлтийн хэрэгт тус банкны ТУЗ-ийн дарга Д.Эрдэнэбилэг, тус банкны Гүйцэтгэх захирал О.Орхон, “Монголиан коппер корпорейшн” ХХК-ийн Гүйцэтгэх захирал Ц.Пүрэвтүвшин нарыг баривчлан шалгаж байна.
-Ар гэр, ажлын байранд нь үзлэг хийсэн юм болов уу?
-Мөрдөн шалгах ажиллагаа дөнгөж эхэлж байгаа учир дэлгэрэнгүй мэдээлэл өгөх боломжгүй.
