2013 он 8-р сарын 17 Бямба,
Онгироо.МН
Эхлэл » Онцлох мэдээ » П.Алтангэрэл Б.Хурцын сануулгыг үл тоожээ

П.Алтангэрэл Б.Хурцын сануулгыг үл тоожээ

Нийтлэлийн төрөл: Онцлох мэдээ, Авилга

П.Алтангэрэл Б.Хурцын сануулгыг үл тоожээ

 

Хэвлэл мэдээллийн хэрэгслээр хэсэгтээ л хэрүүлийн алим шидэлцсэн Соёл, спорт, аялал жуулчлалын яамны төрийн нарийн бичгийн дарга П.Алтангэрэл, тус яамны Соёл, урлагийн бодлогын хэрэгжилтийг зохицуулах газрын дарга Н.Оргил нарын хэрүүл нэг нь ажлаа өгснөөр нам жим болсон.

Тэдний хэрүүлийн алим шидэлцэх болсон гол шалтгаан нь төсвийн мөнгө хувьдаа завшсан гэх маргаан. Н.Оргил өөрийн хүсэлтээр ажлаа өгөх үедээ П.Алтангэрэлийн хууль зөрчсөн үйлдлүүдийн талаар хэвлэлийнхэнд алтан хошуу өргөж байсан нь саяхан.

Харин түүний энэхүү мэдээллийг П.Алтангэрэл эрс үгүйсгэж, өөрийгөө энхийн цагаан тагтаа мэтээр ярьсан нь хэвлэлийн хуудаснаа үлдсэн. Тэгвэл Н.Оргил төрийн нарийн бичгийн даргынхаа талаар худлаа мэдээлэл цацаагүй бололтой.

Учир нь, П.Алтангэрэл албан тушаалд томилогдсоноосоо хойш албан тушаалаа урвуулан ашиглаж байгаа талаарх мэдээлэл өнгөрөгч оны тавдугаар сард АТГ-ынхны чихэнд хүрч байжээ.

Баримтаас харвал 2013 оны тавдугаар сарын 8-нд "Төрийн нарийн бичгийн дарга П.Алтангэрэл нь өөрийн танил тал, хамаатан саднаа албан тушаалд томилсон байна. Ингэхдээ тэрбээр тухайн албан тушаалд томилох тодорхой шаардлагыг хангаагүйг нь мэдсээр байж Дорнод аймгийн хүмүүст албан тушаал олгож байна" гэх гомдлыг нэгэн иргэн АТГ-т гаргажээ. АТГ-ын Мөрдөн шалгах хэлтсээс гомдлын мөрөөр шалгалт явуулаад АТГ-ын дэд дарга Б.Хурцын гарын үсэг бүхий сануулгыг П.Алтангэрэлд өгч байсан аж.

Баримтад дурдсанаар, "П.Алтангэрэл нь 1985-2008 онд Дорнод аймагт ажиллаж байсан бөгөөд гомдолд дурдагсан Санхүү хөрөнгө оруулалтын газрын дарга Р.Хаяндорж, нягтлан бодогч Р.Алтантуяа нар нь мөн аймгийн төрийн байгууллага болон бусад байгууллагад ажиллаж байсан.

Стратеги бодлого, төлөвлөлтийн хэлтсийн дарга П.Алтан-Од, Төрийн захиргаа удирдлагын газрын мэргэжилтэн Р.Оюундэлгэр нар нь Дорнод аймгийн харьяат. Мөн хөрөнгө мөнгө захиран зарцуулах нэг, хоёрдугаар гарын үсэг зурах эрхтэй, Санхүү хөрөнгө оруулалтын хэлтэст хамт ажиллаж байгаа зэрэг нь Нийтийн албанд, нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 3.1.11-т заасан олон нийтийн зүгээс ашиг сонирхлын зөрчилтэй гэж ойлгогдохуйц нөхцөл байдал үүссэн нь тогтоогдож байна" гэж дүгнэжээ.

Иймээс Нийтийн болон нийтийн албанд хувийн ашиг сонирхлыг зохицуулах ашиг сонирхпын зөрчлөөс урьдчилан сэргийлэх тухай хуулийн 7 дугаар зүйлд заасан урьдчилан сэргийлэх үйл ажиллагааг хэрэгжүүлэн ажиллана уу.

Мөн цаашид тус яаманд ажилд орох гэж байгаа хүн нь дээр дурдсан хууль, Төрийн албаны тухай хууль болон бусад салбарын хууль, тогтоомжид заасан шалгуур үзүүлэлтийг хангаж байгаа эсэхэд хяналт тавьж, ашиг сонирхлын зөрчил үүсгэхгүй байх талд удирдлага зохион байгуулалтын арга хэмжээ авч ажиллана гэдэгт итгэж байна" хэмээн АТГ-ын дэд дарга, эрхэлсэн комиссар Б.Хурцын гарын үсэг бүхий албан тоот хүрсэн байх юм.

Гэтэл П.Алтангэрэл баримтад дурдсан бүхий л хуулиудыг зөрчин байж өөрийн хүмүүсээр яамаа дүүргэж, тодорхой шаардлагыг хангасан эсэхийг үл харгалзан хүссэн хүнээ албан тушаалд томилж байсан нь тодорхой болж байна. Б.Хурцын сануулгыг үл тоож байж төрийн албыг төрлийн алба болгоход жинтэй хувь нэмэр оруулж байгаа П.Алтангэрэлийг цаашид хэрхэхээ АТГ, Б.Хурц дарга шийднэ биз ээ.

М.Өнөрөө

Эх сурвалж: Unen.mn

АНХААРУУЛГА: Уншигчдын бичсэн сэтгэгдэлд Tsag.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг,хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэмхэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 96551185 утсаар хүлээн авна

Анхааруулга

Comment on the news site is possible only within (days) days from the date of publication.
Эхлэл Twitter Чөлөөт цаг Шуугианы эзэн Фото мэдээ УИХ Засгийн газар Ярилцлага Эдийн засаг Соёл урлаг Спорт Байгаль орчин Сонгууль Авилга Улс төрч
Зохиогчийн эрх хуулиар хамгаалагдсан. Мэдээлэл хуулбарлах хориотой.